Jæja þá ekki er dugnaður í manni að blogga þessa dagana! Tölvugreyið okkar er nú líka seinvirkt og ég nenni sjaldan að setjast niður og kveikja á apparatinu. En ég get nú samt reynt að vera duglegri við þetta. Hvað um það....ferðin norður á Akureyri síðustu helgi gekk vel og var gaman að kíkja á höfuðstað Norðurlands til tilbreytingar.  Ástæða ferðalagsins var pollamót Þórs og heldur Sigtryggur því enn fram að hann sé polli og pakkaði takkaskónum til að spila nokkra leiki.   Það var reyndar skítakuldi á föstudeginum. Ég fylgdist með Sigtryggi Zidane sýna fótboltataktana í einum leik sem hann spilaði á útiivelli og mér varð svo kalt eftir leikinn-norðan fýla barasta!  Svo rættist smám saman úr veðrinu og besti dagurinn var mánudagurinn. Þá tókum við okkur til og keyrðum til Mývatns og gengum um svæðið og fórum í náttúrulaugarnar þar. Yndislegt alveg hreint.  Svo urðum við að fara suður á þriðjudeginum en hefðum svosem viljað vera aðeins lengur.  Svo er maður búin að vera að þvo þvott og taka heimilið aðeins í gegn síðustu vikuna.  Ég þarf reyndar að mæta reglulega þessa dagana í kírópraktor. Það er verð að láta braka og bresta í mér til að koma hryggnum á mér í rétta skorður. Ég er víst eitthvað skekkjast segja þeir. Svo það er eins gott að koma sér í lag strax svo ég endi ekki eins og hringjarinn frá Notre Dame. Efast um að það sé spennandi líferni! Jámm þetta er að frétta af mér og mínum. Endalausar framkvæmdir líka heima. Þetta kemur með kalda vatninu. það er mikið búið að gera uppi  í risi en margt eftir samt. Von er á rafvirkjum í kvöld að líta á ljósin og sitthvað fleira. Þar hafið þið það gott fólk.  Hafi' það sem allra best þar til næst,góðar stundir!! 

Vá það er nú svolítið langt síðan ég hef tjáð mig hér á síðunni-það er alveg rétt hjá  Halla frænda, ég verð að vera duglegri að segja ykkur sögur   Málið er það að ég var svo mikið fyrir norðan um daginn að ég kunni bara varla á tölvuna lengur þegar ég kom til baka. Ég er búinn að eyða ca 2 vikum í sveitinni þetta sumarið. Fór fyrst í maí til að reyna að hjálpa til í sauðburði og svo var ég í viku þegar Sigtryggur stakk okkur af til Noregs og London Hann fór til Haugasunds til að keppa í fótbolta á Norðurlandamóti ríkisspítalanna og viti menn okkar menn urðu Norðurlandameistara annað sinn í röð. Við fórum einmitt til Malmö fyrir 2 árum og þá unnu þeir líka-alveg æðislegt. Þar hittum við Gumma frænda og hann sýndi okkur ýmislegt í borginni sinni. Já þetta er haldið semsagt á tveggja ára fresti þetta mót en nú vorum við Ingvar bara heima á meðan húsbóndinn fór enda mikið ferðalag fyrir lítinn kropp. Fyrst flogið til London og svo yfir í Haugasund-alltof mikið ferðalag.   Við mæðginin höfðum það svo gott hjá ömmu litlu í sveitinni, við erum að skiðuleggja annað ferðalag þangað. Ég er að spá í að fara á morgun norður og vera í nokkra daga, ná smá tíma þar meðan mamma er í fríi því nú fer því að ljúka. Hún á að byrja að vinna þann 5.júlí.  Sigtryggur verður bara að vera duglegur að vinna svo hann taki ekki eftir því að við séum farin   Nei nei-það er mjög mikið að gera hjá honum í vinnunni, sumrin eru yfirleitt alveg brjáluð hjá honum. Það er stundum of mikið um að vera! Hann segir það stundum að hann vilji láta klóna sig til að ná öllu sem þarf að gera Jæja kannski maður skrifi smá á morgun-veit ekki alveg hvenær við leggjum í hann í sveitina, en nú verð ég að vera duglegri að láta vita af mér! Guð blessi ykkur öll-sjáumst síðar...

Hvað er málið með Geir Ólafs? Vá eins og við vitum öll þá er leikkonan Ágústa Eva heilin og andlitið á bakvið Silvíu okkar stórstjörnu en hver ætli sé á bakvið fígúruna Geir Ólafs?? Sá leikari hlýtur að vera mjög hæfileikaríkur-hugsið ykkur að leika svona fígúru sem heldur því fram að hann sé bestur og flottastur í hópi söngvara í heiminum!! Í Fréttablaðinu fyrir nokkrum dögum var heilsíðuauglýsing með mynd af Iceblue (eins og hann vill kalla sig líka) og texti um það að senda þetta skoffín í næstu keppni sem verður haldin í Finnlandi að ári.  En sú auglýsing er semsagt frá stuðningsmönnum Geirs-það hlýtur að vera leikarinn á bakvið Iceblue og hans föruneyti! Já hann ekkimeirGeir segist vera meira en 100% öruggur á að sigra eurovision næsta ár og þegar ég las þetta þá varð mér hugsað til viðtals við Pál Óskar þar sem hann talar um Silvíu Nótt og keppnina í Aþenu. Það er nefnilega eitt sem henni Ágústu Evu tókst að sýna fram á í gervi Silvíu-það er að hroki verður þér að falli! Svo það er eitt sem hægt er að segja núna við Geir Ólafs-You´re going down!!!

Já það er alveg hægt að segja það að þeir séu komnir til landsins félagarnir Kári og kuldaboli. Þetta er nú meiri veðráttan-það er nú samt sólarlandaveður hér sunnanlands miðað við fyrir norðan! Þar er virkilega kalt og búið að élja og frysta og aumingja kindurnar komast ekkert út með nýju afkvæmin sín. Ekki gott það. Jæja þá er enn einn evróvisjón keppnin búin og ég sem þóttist engan áhuga hafa á keppninni í ár sat spennt yfir stigagjöfinni í gærkvöld og fagnaði ákaft góðu gengi myndarlegasta fólksins sem steig á svið í Aþenu. Mikið hló ég þegar skrímslin yndisfögru spiluðu eftir að hafa sigrað. Loksins eitthvað annað en silíkon bombur í stuttum pilsum að syngja pæjupopp-loksins alvöru rokk og læti. Mér fannst þeir langflottastir og lagið bara virkilega flott.  En svona í heildina séð fannst mér ekkert varið í þessa keppni. Samt alltaf einhver sjarmi yfir þessu öllu-þetta er bara partur af vorinu. Helgin er búin að vera róleg og góð. Við Sigtryggur erum búin að vera að vinna í bókhaldi og dúlla okkur með litla dúlludrengnum okkar! Svo kom Nonni mágur í dag og kláraði að setja upp hringstigann-rosa munur. Olla konan hans kom síðan og voru þau í mat hjá okkur ásamt Júlíönnu og Eika. Svo Sigtryggur fékk að vera aðal kokkurinn-var sendur út með grilltöngina. Þetta var aldeilis ljómandi gaman. Svo kom pabbi hér í mýflugumynd-er nú líka ættaður frá Mývatni    Jámm ég nenni ekki að skrifa meira í bili-ætla bara að fara að halla mér fljótlega, ég veit að ég er orkubolti!! Oki doki-fariði vel með ykkur  elskurnar og góðar stundir.

Já ég held að þetta sé allt að koma hérna hjá okkur Ingvari Óla. Síðustu dagar hafa verið heldur erfiðir og næturnar ekki síst. Reyndar hélt ég að sumir yrðu meira brjálaðir út af þessu en þeir eru   Litli drengurinn minn tekur þessu aðeins betur en ég átti von á semsagt.  Æi það er víst kominn tími á að venja undan sér.  En að allt öðru-mikið eru síðustu dagar búnir að vera hlýir og dásamlegir. Við erum búin að nýta veðurblíðuna og rölta um allan gamla bæinn hér og það er svo gaman að sjá fólkið svona glatt. Allir að dumda eitthvað útivið og bjóða góðan daginn eins og í þorpi úti á land, svoleiðis stemning. Það er svolítið merkilegt hvað allt breytist í svona tíð. Maður er svo bjartsýnn og ánægður og sér hlutina í öðru ljósi. Það lifnar allt við-fólkið, dýrin og gróðurinn og mikið á maður nú gott að geta skynjað veröldina eins og maður gerir. Þaðö er nú þannig með okkur á þessari eyju að drunginn færist yfir okkur í skammdeginu en svo er eins og það séu sett ný batterí í mannskapinn þegar vorar og allt verður miklu skemmtilegra. Já það er um að gera að vera svolítið væminn endrum og eins.  Talandi um vorið og lífið-nú fer að hefjast sauðburður í Bitrunni minni og fer mamma á morgun til að gera allt klárt, sem þýðir að hún missir af afmælisveislunni hans Óla á laugardaginn. Því er nú ver og miður. Þau eru nú eins og systkini alltaf hreint svo mér finnst hræðilegt að hún geti ekki glaðst með honum í veislunni. Svona er nú lífið jamm og já.  Við Ingóli fórum til hennar Ástu ömmu í dag í smá heimsókn. Ég var aðeins að reyna að gera hana fína-lita hárið og svona fínerí. Hún er orðin rosa skvísa eftir daginn   Jæja skrifa kannski smá færslu á morgun ef ég hef tíma. Fariði varlega í umferðinni gott fólk-þar til næst  bless bless.

Jæja annar dagurinn að verða liðinn í brjóstabindindinu og ég verð að segja að þetta gengur allt betur en ég átti von á. Reyndar fékk hann smá sopa í gærkvöld-ég gat ekki tekið allt af honum í einu. Svo var maður vakinn þrisvar í nótt og það tók smá tíma að róa litla kútinn og fá hann til að sofna aftur. Æi eins og Haddý frænka segir þá er þetta eins og sé verið að slíta úr manni hjartað, það er eins og núna fyrst sé einhver að klippa á naflastrenginn   En við erum nú heppin að hafa getað átt þessar stundir saman svona lengi. Það styttist óðum í fyrsta afmælið og manni finnst hann vera nýkominn í þennan heim. Skrýtið hvað tíminn flýgur eitthvað hratt frá okkur! Það er bara komið sumar aftur og veðrið er svo sannarlega búið að leika við okkur undanfarna daga. Við Ingvar fórum í bíltúr í dag og náðum í ömmu gömlu í Byko og var stubburinn glaður að hitta hana. Svo fórum við í Árbæinn og ákveðið var að fjárfesta í ís og kæla sig niður örlítið. Umm ekkert smá gott svona í sólinni. Svo fékk Ingóli að sitja úti á teppi í garðinum hjá ömmu og afa í Sætakofa (Fagrabæ). Svaka stemning. Ella og Halli litu svo í heimsókn og var gaman að hitta á þau blessuð. Þau eru svo dugleg að kíkja til ættingjanna-maður mætti nú alveg vera duglegri við það humm....En það er svona maður situr bara heima á pólskunámskeiðum og dundar sér við eldhúsverkin Jæja þá held ég að ég segi þetta gott í bili og þakka fyrir mig- veriði sæl

Jæja nú er komið að því-ég er að reyna að venja drenginn undan mér. Hann hefur ekki fengið neitt að drekka hjá mér í dag annað en stoðmjólk í glasi og ekki get ég sagt að það ríki mikil ánægja. Það er svona að vera góðu vanur! Svo núna eru harðindi hjá sumum! Við foreldrarnir erum mikið búin að kvíða komandi dögum en þetta kemur nú allt smám saman. Það er ótrúlegt hvað svona lítill karl getur verið ákveðinn og hann veit nákvæmlega hvað hann vill þessi elska Svona er lífið.  Mikið er veðrið búið að vera yndislegt í dag. Sigtryggur er búinn að eyða deginum í bílaþvott enda veitti ekki af því, ég hjálpaði aðeins til að byrja með en þurfti svo að sinna Ingvari mínum enda á hann svo bágt Ég bara lét herrann í kerruna og tók langan göngutúr m.a. inn í Hellisgerði en það er nú bara hér við hliðina á okkur. Mikið er nú fallegt þar í góðu veðri. Svo sátum við lengi í úti í garði á teppi og lékum okkur saman-það er best að lillemann hafi nóg fyrir stafni Jæja get ekki skrifað meira núna, verð að taka drenginn og halda leiksýningu sennilega. Þar til næst-au revoir!

Já gott fólk-ég viðurkenni það að þetta er nú aðeins of langt frí hjá mér! Ég hefði nú getað verið búin að skrifa eitthvað undanfarna daga en hef alltaf fundið eitthvað annað að gera hérna. Það veitir sko ekki af að taka í gegn hérna í íbúðinni eftir allt þetta sag og ryk þarna í efra! Það er allt gott svosem að frétta héðan. Við Ingóli skelltum okkur í sveitina á laugardaginn sl. með mömmu og Grjóna. Það var alveg yndislegt-einmitt sem ég þarfnaðist. Sigtryggur er alltaf svo upptekinn uppi á lofti allar helgar svo við ákváðum bara að yfirgefa svæðið og heilsa uppá Bitruna okkar. Þau voru þarna Ásta og Óli, höfðu mætt til stórbóndans Ingþórs á föstudeginum og stoppuðu til sunnudags. Við hins vegar komum aftur á mánudag-enda frídagur. Það var allt svo fínt hérna hjá húsbóndanum þegar ég kom heim. Búinn að vaska upp eftir helgina og ganga frá eftir vinnumennina sem voru að hjálpa honum. Svo er ég bara búin að vera að reyna að taka í gegn hérna í öllu draslinu-ég er að geggjast á þessu öllu. Alltaf verið að framkvæma og útlitið hér er eftir því! En þetta kemur allt með kalda vatninu. Ég er búinn að henda fullt af dóti og færa til húsgögn inni í stofu-aðeins að breyta og bæta!  Já þetta með bloggið hennar móður minnar-nú er nettengingin eða tölvan sjálf að stríða henni svo að ekkert gengur hjá henni að komast á netið. Ég var að segja henni að fá einhvern viðgerðarmann til sín því við finnum ekki út hvað er að!! Jæja best að reyna að finna eitthvað meira til að henda hérna-svo er ég búin að vera nota tækifærið og fara með ýmislegt út í skúr,svona þegar sumir eru ekki heima. Hann vill alltaf fylla skúrinn af einhverju rusli og ekkert má fara héðan út fyrir plássleysi en ég fann eitt smá horn þar sem ég kom fyrir nokkrum smámunum usss ekki segja frá, kannski fattar hann ekkert   Takk fyrir mig í bili og góðar stundir þar til næst!!

Já nú er miðvikudagur og það þýðir aðeins eitt-það er fimmtudagur á morgun. Gott að geta haft suma hluti á hreinu, maður veit ekki mikið meira um framtíðina en hvaða dagur er á morgun! Jú annars er afmælisdagur á morgun-húsbóndinn á þessu heimili fæddist þennan dag fyrir örfáum árum síðan. Það verður nú eitthvað lítið um hátíðahöld, ætli ég sjái hann nokkuð að ráði á morgun. Hann vinnur svo mikið svo þarf hann að hitta hópinn sem hann fer með til Noregs í sumar á spítalaleikana. Alltaf í boltanum eins Hemmi okkar!! Svo afmælisdagurinn hans verður góður að því leyti að hann kemst í smá orlof frá nöldrinu í mér umm ekki slæmt.... Nei nei ég er nú ekki svo vond við hann.  Dagurinn í dag var frekar rólegur en svo þegar Sigtryggur kom heim þá kom Stasi litháenski  Pólverjinn til okkar til að þræla á loftinu. Svo er Jón Þór mágur einnig búinn að vera hér í kvöld að hjálpa litla bróður sínum með stigann upp-hann gengur víst niður líka! Þetta er samt ekki rúllustigi, við erum ekki svo nútímaleg hérna. Kannski við hefðum bara átt að hafa lyftu! Litli gaurinn er búinn að fylgjast með atgangnum í kvöld alveg spenntur, ef hann væri aðeins eldri þá gætum við nýtt hann í að taka til fyrir okkur-ætli það komi ekki fljótlega að því. Í dag er akkúrat mánuður í ársafmælið hans-vá hvert fóru allir þessir mánuðir??  En nóg af okkur í bili. Hafið það sem best þar til næst-góðar stundir!

Gott kvöld góðir landsmenn! Ég er búin að komast að því, mér til mikillar skelfingar að sonur minn er sennilega af górilluættum! Allavega mætti halda það miðað við hljóðin sem hann er farinn að gefa frá sér þessa dagana...Hann er byrjaður að öskra svona af og til og heldur víst að hann sé svakalega fyndinn og afli sér vinsælda á heimilinu-sem hann gerir ekkert sérstaklega. Við foreldrarnir vorum að reyna að koma honum í skilning um það að þetta væri ekki fyrirmyndarhegðun ungra drengja en viti menn-drengurinn skellti upp úr. Ætli hann sé strax kominn á mótþróaskeiðið-úff mikið verður gaman þegar hann kemst á unglingsárin ef þetta á eftir að magnast með aldrinum Þessi dúllurass er nú samt yfirleitt ósköp ljúfur og skemmtilegur   Við tvö erum búin að dunda okkur í dag í fallega veðrinu. Una vinkona kom aðeins í morgun í kaffi með hana Kívu sína (Karen Drífa),hún segir nafnið sitt svona litla skottið. Því miður hittust stubbarnir ekkert því Ingvar var einmmitt að lúra þá og hlaða batteríin. Svo fórum við mæðginin í göngutúr niður í Fjörð til að finna eitthvað sniðugt til að gefa húsbóndanum-en hann á afmæli á fimmtudaginn nk. Já tíminn flýgur á ljóshraða!!  Já, ef að Station er að lesa þetta, þá ætlaði ég bara að segja þér að faðir þinn er hérna hjá okkur núna. Hann er að hjálpa Sigtryggi að smíða Alltaf svo gaman hjá okkur hérna í Alþjóðahúsinu í Hafnarfirði!! Kannski þeir séu að smíða fyrir mig ferðavél svo ég komist á milli-ég er nefnilega bíllaus þessa dagana, þurft að fegra rútuna okkar aðeins.  Jæja-best að hætta núna áður en þið verðið leið á rausinu í mér. Fariði vel með ykkur elskurnar-gúdbæ....

Jæja, gerði tilraun til að skrifa í dag og var komin vel á veg þegar allt hvarf!! oh, þá nennti ég ekki að skrifa meira, svo núna er ég sest við skriftir og klukkan að ganga eitt um nótt. Þá eigum við að vera farin að sofa-en það var mikið um að vera hér á bæ í kvöld. Pólverjarnir þrír voru hérna til kl.23 svo að hér er mikið líf og fjör Það er allt of mikið að gera hjá Sigtryggi mínum finnst mér, í vinnu frá morgni langt fram á kvöld! Hann fékk reyndar smá frí um helgina þegar við fórum á Broadway. Við fórum með mömmu og Sigurjóni á þessa líka flottu sýningu Nína og Geiri-söngbók Bó Hall. Ég reyndar sá bara show-ið eftir hlé-missti alveg af fyrri helmingnum, og mamma er ennþá svo svekkt fyrir mína hönd, þetta var víst miklu flottara fyrir hlé en svona er nú bara lífið. Ég varð að skjótast heim í mömmuleik og gefa litla brjóstabelgnum mínum og koma honum í ró! Hann var heima í passi hjá afa sínum og svo voru vaktaskipti og Júlíanna og Eiki mættu á svæðið til að taka við. Þau fengu það skemmtilega verkefni að svæfa lúllann, enda gott fyrir þau að æfa sig áður en krílið þeirra kemur í heiminn í september! Þegar við Sigtryggur komum hingað heim var sá stutti steinsofandi í vagninum sínum-jámm það varð bara að keyra gaurinn um til að svæfa hann-hann hefur sjálfsagt vantað eitthvað     Þessi litli ákveðni maður lætur alveg vita af sér. Hann var svo spilandi kátur hérna í kvöld þegar Jarek hinn pólski tók hann í fangið þegar átti að fara að snæða kvöldverð. Það endaði með því að S.tryggur náði í stólinn hans litla svo hann gæti setið til borðs með þeim öllum, þá var kátt í höllinni. Hann er alveg ótrúlegur með þetta að vilja alltaf vera þar sem fjörið er-einn af Tröllaættinni     Ég held vara ég láti þetta gott heita í bili, er farin að hugsa mikið um rúmið mitt akkúrat núna svo ég kveð ykkur að sinni og segi góðar stundir gott fólk!

Dagur er að kveldi kominn og ég er nýbúin að svæfa litla brjóstabelginn minn. Hann var orðinn dauðþreyttur eftir amstur dagsins, hann leggur sig reyndar 2svar yfir daginn litli snúðurinn. Hann er svo yndislegur að það bræðir okkur foreldrana endalaust Pólverjarnir mínir elskulegir voru að yfirgefa okkur eftir þrældóm hérna í risinu. Nú var elduð gúllassúpa ofan í liðið og held ég að þeim hafi líkað það ágætlega-allavegana var mikið borðað. Pabbi kallinn var svo heppinn að vera akkúrat hérna þegar ég var að elda svo hann fór ekki svangur heim. Karlanginn er óttalega slappur, búinn að vera með einhverja pest og er barasta kominn á penicillin-kúr! Ekki gaman það. Ingóla fannst ofsa gaman að sjá afa sinn, þeir hafa ekkert hist í viku félagarnir. Hvað haldiði!!? Hann Sigtryggur minn kom bara heim með risa blómvönd í kvöld og afhenti mér, svona í tilefni af komandi sumri. Rosa sætur-ekki nema hann hafi eitthvað verið að gera af sér gaurinn   Nei nei, það er alltaf gaman að fá blóm. Jámm-nú er veturinn barasta liðinn hjá á ljóshraða, þetta líður svo hratt. Fyrsti sumardagurinn á morgun og maður finnur þennan vorilm í loftinu. Veðrið er svo fallegt, kvöldin eru bara yndisleg, ummm....Jæja hef ekki meira að segja í bili en skrifa kannski bara smá á morgun....Góðar stundir vinir mínir!

Sæl verið þið! Nú hefur maður ekkert látið í sér heyra í nokkra daga, en við fjölskyldan lentum í Hafnarfirði í gærkvöld eftir nokkurra daga sveitasælu. Mikið hafði ég gott af þessu-það er nauðsynlegt að fá ferskt Bitru-loft í lungun reglulega Við höfðum það mjög fínt en það var ansi mikið um að vera og ég er hrædd um að hún móðir mín elskuleg hafi ekki alveg fengið þá hvíld sem þurfti. Þetta var eiginlega meira eins og hótelrekstur hjá henni frekar en páskafrí! Ég vona að hún  nái að vinna sér upp smá hvíld fljótlega blessunin....Ingvar Óli hafði varla tíma heldur til að hvíla sig, hann var svo spenntur að fylgjast með krökkunum og vildi helst fá að vera með í fjörinu og missti nú svolítið úr svefninum, en er í óðaönn að bæta sér það upp nú fyrst hann er komin heim til sín í friðinn. Svo er maður bara að þvo þvott og taka eitthvað til hérna á heimilinu og leika húsmóður. Pólverjarnir mínir voru að fara frá okkur, unnu hérna uppi í kvöld svo það var mikið eldað og mikið borðað Það er svo gaman að gefa þeim að borða, þeir eru svo þakklátir og hrósa manni alltaf-voða sætir greyin! Ingóli er svaka hrifinn af þeim og vill alltaf vera með þeim uppi og lætur vel í sér heyra þegar hann má ekki fara til þeirra! Hann fer örugglega að tala pólsku á undan íslensku Jæja,nú ætla ég að fara inn í stofu og setjast fyrir framan imbann og horfa á Rome-síðasta þáttinn, hann er víst endursýndur. Rosalegir þættir!! Góða nótt kæru vinir og dreymi ykkur vel......

Húrra húrra!!! Nú legg ég í hann á morgun, í sveitasæluna ég fer með son minn til að hitta fólkið og dýrin... Tryggurinn okkar mætir svo á svæðið á laugardag og fær víst að sitja í hjá Kjartani stórfrænda. Sigtryggur tímir ekki að fara frá risinu strax, ætlar að eyða dögunum uppi, ásamt Stasi Litháa held ég. Alltaf nóg að gera hjá Sigtryggi-hann er líka svo duglegur þessi elska.  Jæja nú var aldeilis gaman hjá minni í dag-í Bónus Mikið er ég hrikalega fegin að vera sloppin þaðan út, ég hef aldrei verslað eins mikið þarna eins og í dag-aumingja mamma að gera þetta reglulega. Það er ekki mikið um búðir fyrir norðan eftir að kaupfélagið á Eyri hætti! Svo það er eins gott að versla vel þegar fólk á leið í Bitruna. Ég minntist á það í gær í skrifum mínum hér að ástandið hefði verið svakalegt í páskaeggjadeild Krónunnar í gær-en vá, í dag var keyrt á mig inni í Bónus! Í alvöru, það var kona með kerru og hún bara keyrði beint á mig og sagði ekki einu sinni fyrirgefðu! Hvað er að koma fyrir fólk, getum við ekki aðeins haldið ró okkar þrátt fyrir yfirvofandi hátíðir og lokanir verslanna í nokkra daga?? Þurfum við virkilega að slást um besta og ódýrasta bitann með kjafti og klóm?! Ég allavega reyndi að taka þessu með ró og mjakaðist áfram með stútfulla kerruna um alla búð, manni líður miklu betur bara með því að anda djúpt. Reyndar hafa sumir sagt að það renni varla í mér blóðið, en það er kannski bara einhver ímyndunarveiki í fólki   Veit ekki..... Ég óska ykkur öllum gleðilegra páska og borðiði bara nógu mikið og slappiði af! Sjáumst í næstu viku-gúdbæ.

Í dag er þriðjudagur og hver fer að verða síðastur að versla inn fyrir hátíðina-jæja allavega ég. Nú stefnum við Ingvar Óli á það að leggja í hann norður á Strandir á fimmtudaginn. Ég er strax farin að hlakka til að komast í sæluna þar! En eitt stórt verkefni verð ég að leysa áður-fara í Bónus!! Eins og það er yndislega skemmtilegt svona rétt fyrir páska Ég þurfti aðeins að skreppa í Krónuna áðan, vantaði kaffi og smér og svona smáræði, það var svo rólegt þegar ég gekk inn í búðina og fínt að tína í kerruna góssið sem mig vantaði en svo viti menn-þar sem eggin sem kennd eru við páska eru geymd-þar var örtröð!! Þeir tóku víst vsk af í dag og fólk hamstraði þvílíkt og allt að verða búið og ég komst varla að kassanum fyrir liðinu sem glápti bara á eggin en ekki á þá sem reyndu að ganga þarna um! Ótrúlegt tillitsleysi hjá sumum en hvað um það, við Ingóli sluppum ómeidd út  Þetta er það eina sem mér finnst hálf leiðinlegt við hátíðarnar-fólk fær svo mikið kaupæði að það veit ekkert hvað snýr uppóg hvað niður.  Ég er búin að biðja hann pabba minn blessaðan að koma á morgun og sitja hjá dóttursyni sínum á meðan ég heimsæki bleika svínið þeirra Jóhannesar og Jóns Ásgeirs. Ekki hætti ég mér með blessað barnið í þennan frumskóg þar sem allir reyna að keyra þann næsta niður með innkaupakerrunum til þess eins að næla sér í bestu bitana! Pabbi hefur nú líka svo gaman að því að koma og hitta litla gaurinn okkar.  En jæja þá í þetta sinn, skrifa kannski aðeins á morgun og læt vita að ég hafi lifað af að fara í verslunarferð! Bless á meðan og hafið það gott!